الشباك

الحقيقة حقيقة....بنشوفها واللا بنهرب منها برضه حتفضل حقيقة....ممكن نشوفها حياتنا تتحول لجحيم....وممكن نشوفها حياتنا تنور...رغم صعوبة تقبل الحقيقة....لكن ممكن تغير حياتنا للأفضل...مع العلم أن رفضنا لرؤية الحقيقة لايغيرها....ستبقى كما هى...حقيقة.

 

لما تبص من الشباك
تلقى الخلق بتسعى يوماتى 

رايحة وجاية هنا وهناك

تاكل تشرب تتعب تشقى
كل ده كله وأنا وياك
لكن فى شباك مقفول
مقفول قفلة مالها مثيل
بس فتحته أنا وبصيت
قلت بسرعة بس ياريت
كنت معايا تملى عينيك
واللى لاقيته سوا تنقاسمه
عندى شوية وحبة عليك
أصل الحمل ياصاحبى تقيل
حتى إن كان عودك متعافى
ماللى تشوفه ساعات بيميل
كنت لوحدى لما فتحته
فجأة لاقتنى غير الناس
شفت كلامهم جالى ذهول
هما كمان بيشاوروا عليا
بصوا وشوفوا دا واد مخبول
شفت وأول لحظة أنا قلت
إيه خلانى بس أشوف؟!
فجأة الرعب اتملك منى
قلبى يزعق مليان خوف
بس لاقتنى بعد شوية
راضى بنفسى وفرحان بيها
وسط الناس أنا مش مكسوف
لو فكرت تبص معايا
إيه يجرى لك بعد شوية
الموضوع ده بشرحه يطول
شكلك ناوى... ياللا تعالى
بس بأقول أنا مش مسئول
لما حتفتح دا الشباك
تلمح حيطة وفيها دولاب
فوق الرف حتلمح علبة
ياللا افتحها دى فيها جواب
تقعد تقرأ سطور وسطور
لما حتقرا.....
ممكن تغرق فى المحظور
بحر حقيقة بموجه العالى
الحريف ما نخافش عليه
بس نحذر منه الهاوى
بحر حقيقة عليه بنقول
واقع غيرنا يشوفه خيال
شئ بنحسه وما بيتقال
الشباك دا أكيد مش عادى
يفتح مرة وما بيقفلش
يبقى لابد يكون مسحور
غيرنا يبص يقع فى البير
كل حياته تصبح ضلمة
فيه ناس تانية لما بتفتح
تلقى عبير ونسيم وبخور
الشباك ده صبح لحياتهم
هو لوحده طاقة نور

د.نهلة نور الدين حافظ