فى المثل الشعبى بيقولوا إن كتر الحزن بيعلم البكا...لكن كتر الحزن ممكن ينسى البكا...ويفقد معه الإنسان إحساسه بالحياة..فيعيش فى حالة بين
بين...لايعرف هل هو على قيد الحياة أم أنه فارقها...إنها حالة من خدر المشاعر يفقد معها الإنسان القدرة على البكاء...القدرة على معايشة خبرة الحزن أو الفرح...
من نومى قمت
مخضوض وبسأل
إيه جرى؟
جوايا حاجة مش فاهمها
مش حاسسها
وتكون دى إيه ياترى؟
جوايا فين حزن السنين؟
أنا فاكر إنى لما نمت
كان قلبى هو اللى أعرفه
مكسور حزين
دلوقت قلبى خلاص سكت
ولاحد يقدر يكسره
حتى لو كان انشاالله مين
مش عارف أفرح واللا إيه؟
قلبى خلاص ما بقاش يحس
الدنيا جوه هس هس
حتى المرايا اتغيرت
وشى خلاص من غير ملامح
وكأن فوق الوش وش
أنا نفسى أرجع تانى أنا
بالحزن عشت سنين طوال
لكنى صامد ماانتهتش
وأنا فى الحالة دى وبأتنفض
أم جانى واحد كان معدى
هدى وجانى لحد عندى
سألنى لما شاف عيونى
الدمعة فيها مخاصمة خدى
هو أنت ميت واللا عايش؟!
وشك قصادى
أنا شايفه فاضى
من غير كتابة عالسطور
ولاحتى كلمة فى الهوامش
قلت له كل الحكاية
إنى بحزنى ماارتضتش
أم حزنى راح من غير معاد
سابنى لوحدى
أنكوى بنار البعاد
مد إيده بابتسامة
وقال حاأساعدك
خد وجرب كاس سعادة
جربته لكن ماارتوتش
خدنى معاه لبيت غريب
فيه ناس بتبكى عالفراق
شكله اللى راح منهم حبيب
مالقتش حزنى فى وسطهم
ومشيت أقول:
دى ناس بتحزن
على الحزن قلت يابختهم!!
عدت ليالى بأنتظر
ولا اللى راح منى رجع
نفسى ولو لحظة أحس
حتى ولو فيها أتوجع
ياناس قولوا لى أعمل إيه؟
حاسس بحالة ماتتوصف
فى العلم لسة ما تقالتش
نفسى أدوق حبة مشاعر
نفسى أقول أنا لسه عايش
والله بينكم مااختفتش!!
د.نهلة نور الدين حافظ
أخصائى الطب النفسى
ليست هناك تعليقات:
إرسال تعليق