وسط الشارع والميادين
تلقى الناس رايحين جايين
يمشوا ويقفوا
يسبقوا غيرهم أو يستنوا
يسعوا ألاف أو بالملايين
ده حسونة واللا حسين
ودى شلبية واللا ندين
اسمى واسمك يفرق إيه
أنا واللا أنت بنى أدمين
خوفى وخوفك
حزنى وحزنك
فرحى وفرحك
نفس اللون مش مختلفين
كلنا واحد نفس المعنى
وسط حياة كلنا بنعيشها
جايز برة حدودنا بتفرق
لكن جوة نفس الخامة
روح بتدب فى نفس الطين
نفسك تعمل حاجة بجد؟
سور العمل الطيب يعلى
مهما الريح تيجى وتتعافى
عمره ما يضعف ولايتهد
شوف إحساسك لما بتحزن
واللا مشاعرك لما بتفرح
تعرف إنى بأحس بإيه
أصل أنا زيك...
زيى وزيك برضه شيرين
وكمان شادى ونصر الدين
شوف الجرح بيعمل إيه
لما حتجرح ...
قلبك ييجى قوام ويقولك
ده أنت عرفت الجرح وألمه
طب فهمنى بتجرح ليه؟!
أنت عرفت الفرح وطعمه
تقدر تسعد ياما قلوب
بالإحساس اللى اتعلمته
حجر القسوة لابد يلين
تصبح أنت الحضن الدافى
ماتسيب باكى واللا حزين
كده راح تصبح مالعايشين
يجرى فى دمك طعم حياة
بيها يدق القلب ويصفى
ولايتعبش سنين وسنين
طعم حياة ما بيتغيرش
باق معاك لنهاية عمرك
يكبر كل ما يكبر سنك
باق وحتى بعد ما ترحل
كلمة خير متقالة فى سيرتك
يقروا الفاتحة ومش ناسيين
فاضل إنى أفكر قلبك
حس بغيرك ....قدر ضعفه
الإحساس الطيب نعمة
ليست هناك تعليقات:
إرسال تعليق