ألبوم صور

ويا أهلى فى يوم كده..
كنت واقف وسط شارع
على اليمين فيه ناس بتضحك
والكهارب ضوءها لامع
دا زفاف بنت الجيران
دا عريسها اللى وصل
أنا شايفه طالع
عالشمال أنا كنت سامع
ناس بتبكى عاللى راح
اللى كان زين الشباب
أصله كان طويل وفارع
قمنا خدنا بعضنا
عاليمين كلنا الملبس والجاتوه
عالشمال شالوا اللى راح وكفنوه
ورجعنا تانى للمكان
وسط شارع أو ميدان
فتحنا ألبوم الصور
شفنا فرح سامى وجيهان
وعيد ميلاد بوسى وحنان
وفى صفحة تانية عالشمال
شفنا اللى راحوا من زمان
قلنا يادنيا استنى حبة
طب ساعة واحدة!!
نحس فيها بالأمان
الدنيا قالت :
ده يصوت ..ده يزغرد
مالى دعوة..ده جنان
ماأقدرش أوقف شغلى ثانية
وإياك تقولوا دا مرة تانية
الدنيا ماشية مكملة
والناس بتضحك فى الليالى..
عايزة تنسى مصهللة
الدنيا ماشية ومش حترجع
ومهما نصرخ مش حتسمع
لاليها دعوة باللى راح
ولا اللى يبكى أو بيضحك
فى المسا واللا الصباح

د.نهلة نور الدين حافظ