المرايا

أنا شفت نفسى حزين
سألت عن السبب
فيه ناس شافونى جميل
غيرهم قالوا العجب                               

احترت أصدق مين
سألت ناس تانيين
قالوا لى بص لنفسك
تسألنا إحنا ليه!!
جرب واسأل مرايتك؟
بصيت مالقتش حاجة
فى النص نقطة سودا
ولا أى حاجة غيرها
خلاص كله اتحجب
بحلقت فيها تانى
ملقتش أى حاجة
يادوب دقن وشنب
جابوا لى كام نضارة
قالوا لى بص كمان
فعرفت إنى زمان
مرايتى كت مشروخة
والشرخ كان فى النص
يقولوا إنت كويس
ألف تانى وأبص
مأشوفش غير الشرخ
أتارى دى مش صورتى
دى مرايتى كانت فخ

د.نهلة نور الدين حافظ

أخصائى الطب النفسى