ابدأ

مش بالسن...وقت ما تعرف ابدأ....شبابك يبدأ وقت ما تبدأ....المهم تعرف أنت عايز إيه فتبدأ

بعد ما عدى العمر وشاب
كان بالصدفة بيقرا كتاب
قلبه اتنطط قوى مالفرحة
لما عيونه كانت رايحة
ناحية سطر ناداه بيقوله
هو شبابك ولى وغاب
بس لحيرتك عندى جواب
قوم اتحرك ياللا بسرعة
خبط جامد قوى عالباب
ردوا عليه الناس من جوه
مين بيخبط؟
قال أنا هو
عندى حاجات أنا نفسى أعملها
قالوا إزاى مش ممكن تدخل
باب الزمن اترد خلاص
مدة طويلة مسوجر بينا
لو نفتح لك
يبقى نخالف أمر كبيرنا
قلت ياناس استنوا عليا
افتحوا حتة من دا الباب
لو نتكلم بس شوية
وقتى الفاضل زمنه قصير
عايز أرجع
بدى ما بينكم وقت كفاية
بصوا وشوفوا عاللى معايا
أدى بطاقتى
وأدى بطاقة بتوصف عقلى
بصوا وقالوا دا أنت حكاية
سألوا كبيرهم
عمره بطاقة؟
واللا شبابه بعقله يكون؟
نط بسرعة قوام بيزعق
افتح ياللا الباب وهاتوه
دا أنا لوأسيبه أكون مجنون
عقله شبابه أكيد يلزمنى
لما أنا شفت بطاقة عقله
طلع الراجل أصغر منى
جريوا عليا وفتحوا الباب
أنت عجوز واللا أنت شباب
حسبة عمرك وصفة عقلك
مش محتاجة لأى كتاب
وقت ما تعرف عايز إيه
إوعى تقول العمر أهو راح
العداد راح يقلب تانى
ابدأ لسة الدنيا براح
لما حتعرف إن شبابك
يبدأ لما تفكر تبدأ

كده تبقى أنت خلاص مرتاح

د.نهلة نور الدين حافظ
أخصائى الطب النفسى