أضحك.....أبكى....أنا موجود

أضحك أبكى أنا موجود

لاتحبس أحزانك...دعها تتحرر حتى تتمكن من ضحكة صادقة من القلب...تصالح مع الأحزان....فأنت بحاجة لأن تحزن تماماً مثلما أنت بحاجة للسعادة....تحزن وتبكى....تسعد وتضحك فأنت على قيد الحياة

جربت فى مرة
إنك تضايق
فتلاقى الضيق
مش من حقك
والدمعة كمان
مش ليك؟!
الناس حواليك تعرف تبكى
مش عارف تقعد وياهم
عالحزن قفلت الشبابيك
محبوس جواها وبيصرخ
والآه مش ساكتة
فى سكون الليل
صوتها ينازع وتقطع فيك
فكرت وقلت أنا مش قاعد
خليكى يا آه تبقى لوحدك
أتاريك
قررت وقلت أنا حأتغير
مش لازم أبداً أتضايق
وحأجرب مرة أكون رايق
والضحكة تعاند فى الآه
خليها تصوت محبوسة
الضحكة أنا قررت أصالحها
من مدة دى كانت مقموصة
جربت .....حاولت
بس أنت رجعت
وأنا شايفك قاعد بتفكر
كام مرة
وبنفس اللعبة الكدابة
دا أنا ياما لعبت
وأنا فاكر إنى راح أتهنى
من كاس المر أنا شربت
عمال تضحك لى وعاملى
قال فيها سعيد
عالآه تتدلل وسايبها
مخدوع طول عمرك وفاكرها
راح تزهق يمكن وتفارق
بتقولك مش ممكن أسيبك
وفى ضلك أنا حأمشى أكيد
دى الآه جواك جدعة أصيلة
عمالة ترعرع وتزيد
طول عمرك حيران وبتسأل
أنا حأعمل إيه
الآه محبوسة وبتنادى
وعليها الشباك مقفول
بتغير مالضحكة المزعومة
بتلومك إنك تحبسها
الضحكة فى إيه أجمل منى؟!
وبجد أنا وياك مصدومة
الآه مش لازم تحبسها
حررها وياريت تراضيها
الضحكة تجيلك وتجلجل
من غير ما تفكر تناديها
والآه أحيانا تحتاجها
فصالحها وخليها تسامحك
لو يوم تحتاجها....تلاقيها

د.نهلة نور الدين حافظ
أخصائى الطب النفسى